Familias de Marrubio, Montederramo, piden que o bus pare na súa aldea

Veciños da parroquia de Marrubio, en Montederramo, amosan o seu malestar polos recentes cambios na ruta do autobús escolar, que obrigan a varios nenos a desprazarse ata 300 metros para acceder ao servizo, malia que o vehículo continúa pasando por diante das súas casas.

“Desde a nosa casa ata a parada os nosos fillos agora teñen que andar 300 metros para atrás. Todo isto mentres o autobús segue pasando por diante da nosa casa”, explica unha nai afectada.

A situación afecta principalmente ás zonas das Lamelas e do Outeiro, onde o autobús deixou de realizar parada, o que, segundo os veciños, está a provocar rutas “sen sentido” sen entender que pasen “practicamente baleiros” e lles custe facilitar o servizo aos máis pequenos. Reclaman unha revisión urxente do servizo e unha solución adaptada á realidade do rural.

Pola súa banda, desde a Xunta aclaran que a parada de Marrubio é a única autorizada no catálogo oficial e que non consta ningunha solicitude tramitada polos cauces establecidos para modificar o itinerario. Engaden que calquera cambio deberá axustarse aos criterios da Instrución Conxunta sobre o transporte escolar .