Montederramo saboreou o seu día grande coa Festa da Carne

Montederramo viviu onte unha xornada festiva marcada polo bo tempo e pola gran participación veciñal e visitante na trixésima edición da Festa da Carne e a sétima Feira de Gando Vacún.

Baixo un sol espléndido, centos de persoas achegáronse ata o recinto feiral para gozar dunha das citas gastronómicas e gandeiras máis consolidadas da provincia.

As entradas para o xantar popular, organizado polo Concello, esgotáronse días antes do evento, e finalmente 1.300 persoas compartiron mesa baixo a gran carpa instalada no recinto. O menú, elaborado con produtos locais, incluíu empanada de carne, carne ao caldeiro, carne richada e bica, a un prezo de 22 euros, con entrada gratuíta para menores de dez anos.

A carne servida procede de nove tenreiros de Montederramo, e cos excedentes habilitouse un punto de venda de carne fresca á entrada do recinto, que rexistrou longas colas de compradores durante toda a mañá.

O alcalde, Óscar Diéguez, amosouse satisfeito pola gran acollida: “A comida ten moi boa aceptación, e moita xente quedou sen entrada polo rápido que se venderon. A gandería no noso concello é fundamental; todo o verde que temos ao redor, cos lameiros limpos, é grazas aos gandeiros, e tamén a súa boa actuación nos incendios”, afirmou.

Paralelamente á festa gastronómica, a Asociación de Gandeiros de Montederramo organizou a Feira de Gando Vacún, que contou con máis de 200 reses, na súa maioría de explotacións deste concello, aínda que tamén asistiron fanderías de concellos limítrofes. O recinto converteuse nun escaparate da vitalidade dun sector que segue medrando a pesar do descenso poboacional.

Diego Vázquez, membro da asociación, destacou o éxito da cita, na que este ano participaron preto de 40 explotacións coas súas reses: “Cada ano temos máis número de vacas no recinto; para nós é a maneira de poñer en valor o noso traballo e a nosa carne”, explicaba mentres observaba a longa fila de persoas agardando para mercar carne fresca.

A festa completouse coa música das charangas El Tattoo e Nova de Trives, que puxeron ritmo a un evento que segue a ser símbolo de identidade e para Montederramo.

A feira de gando reafirma o pulso do sector neste concello ourensán

En Montederramo, unha explotación con medio cento de vacas xa é considerada pequena.

O municipio continúa a destacar como un dos grandes bastións gandeiros da provincia de Ourense, onde, malia a perda constante de poboación, o número de reses segue medrando ano tras ano. Comparando o censo gandeiro co poboacional, poderíase dicir que en Montederramo hai arredor dunha ducia de vacas por cada veciño censado.

A fórmula é clara: menos granxas, pero máis grandes e mellor preparadas, apostando pola profesionalidade.

As explotacións actuais combinan tradición e innovación, cunha nova xeración de gandeiros que está a coller o relevo e que ve na carne de calidade unha oportunidade de futuro.

Moitos mozos e mozas decidiron quedar ou volver ao concello para dedicarse ao gando, apostando por razas autóctonas, e mantendo vivo un oficio que define a identidade local.