Monterrei honra os seus maiores cunha gran festa en torno á mesa

O 1 de maio, pero de 2019, tivera lugar por última vez a Xuntanza dos Maiores, unha celebración xa arraigada daquela na vila de Monterrei coa que o Concello homenaxeaba os seus veciños de maior idade. Un pretexto para reunirse todos xuntos, compartir mantel e mesa e desfrutar da vida, da amizade e da familia cada primavera.

Coa chegada da pandemia, a vida cambiou por completo, e as prioridades pasaron a ser outras. Por sorte, seis anos máis tarde a alameda de Albarellos volveu reunir este xoves a preto de 550 persoas, entre veciños, familiares, autoridades e persoal do Concello. Unha XIII edición que se fixo de rogar, pero que volveu por todo o alto e para quedar.

A xornada arrancou cunha misa, previa á benvida institucional. O alcalde, José Luis Suárez, agradeceu a Xunta e Deputación a recuperación dunha “fermosa festa” que é “máis que un xantar: un acto de recoñecemento ao que representades os maiores, porque honrarvos é unha obriga moral”.

Destacou asimesmo a organización do Concello, cunha mención especial “ao persoal do servizo de axuda no fogar, que coidan dos nosos maiores”.

Luis Menor, presidente provincial, salientou que retomar esta celebración é “un símbolo de normalidade”, e interpelou á veciñanza, xa que “grazas a vós estamos aquí”.

Arroupando a Suárez e o seu grupo de goberno estiveron o director xeral de Maiores e Atención sociosanitaria, Antón Acevedo, e o delegado territorial, Manuel Pardo, deputados autonómicos e provinciais, e os mandatarios das veciñas Cualedro, Oímbra e Riós.

Xantar festivo

Na animada paparota, a cargo do restaurante Brasil, non faltaron nin a empanada, nin o pulpo, nin a carne ao caldeiro. A amenización da orquestra Xoldra e dos gaiteiros de Flariz e Medeiros foi animando a tarde e sacando os veciños a bailar.

O fin de festa prolongouse grazás a discomóbil De Luxe, coa convicción de que hoxe xa queda un día menos para que os maiores de Monterrei se volvan xuntar.