Muíños acondicionará os seus espazos públicos

A Xunta e o Concello de Muíños colaboran na mellora de espazos públicos do municipio, na que se investirán máis de 630.000 euros. A conselleira de Vivenda e Planificación de Infraestruturas, María M. Allegue, xunto á directora xeral de Urbanismo, Encarnación Rivas, asinou esta semana co alcalde deste concello da provincia, Plácido Álvarez, o convenio para executar esta intervención ao abeiro do Plan Hurbe.

A mellora proxectada levarase a cabo no lugar de Muíños, parroquia de San Pedro de Muíños, na contorna de elementos do patrimonio cultural, do patrimonio natural que inclúe a Reserva da Biosfera transfronteiriza Xurés-Gerés, varios regatos e liñas eléctricas. Actuarase en zonas que se utilizan como punto de encontro e esparexemento do núcleo e que pola súa singularidade necesitan un adecuado acondicionamento para a súa posta en valor.

A intervención abordará a mellora da pavimentación con revisión das instalacións urbanas e soterrado de redes para dar continuidade ás actuacións xa iniciadas noutras fases de humanización de rúas doutros núcleos seguindo os mesmos criterios, creando unha pavimentación idónea para o uso peonil e de tráfico lixeiro, principalmente na parte antiga do núcleo, buscando dar uniformidade a todo o conxunto.

A Xunta encargarase da licitación das obras, que contan cun prazo de execución de 6 meses. De acordo ao convenio asinado entre as administracións, o Goberno galego financiará os traballos coa achega do 70% do orzamento, que representa 442.943 euros; e o Concello de Muíños achegará o 30% restante, 189.833 euros.

Plan Hurbe

Martínez Allegue puxo en valor o Plan Hurbe, co que a Xunta colabora cos concellos no impulso de actuacións de mellora de contornas urbanas, de accesibilidade e supresión de barreiras arquitectónicas e de equipamentos públicos para contribuír á revitalización do territorio.

A través deste programa, a Administración autonómica tamén posibilita reforzar o atractivo das aldeas, vilas e municipios, o que redunda na mellora da calidade de vida da veciñanza, no reforzo da competitividade económica e na fixación de poboación, especialmente no rural.