Carlos Rodríguez Calvo, mantedor do Premio Antón Losada Diéguez: “Quizais sexa o momento de incrementar a contía”

Cando se cumpren 40 anos do pasamento de Manuel Chamoso Lamas, e coincidindo coa 40 edición do Premio Antón Losada Diéguez, o Concello do Carballiño, institución á quen lle corresponde este ano a organización, designou a Carlos Rodríguez Calvo, periodista, escritor e presidente do centro de estudios que leva o nome do arqueólogo de Moldes, como mantedor do acto de entrega dos galardóns o vindeiro 14 de xuño.

Os galardoados son: na modalidade de creación literaria o escritor Manuel Rivas pola novela “Tras do ceo”, que na versión en castelán tamén obtivo o Premio Nacional das Letras Españolas 2024; e na modalidade de investigación e ensaio o profesor de literatura Alberto Pombo pola obra “Verso e acorde. Relacións entre a literatura galega e a música pop (1950-2000)”.

O acto de entrega terá lugar no pazo da familia Losada en Moldes ás 12 do mediodía. Previamente, hai misa e ofrenda floral na igrexa románica de San Mamede de Moldes, declarada Monumento de Interese Artístico Nacional dende o ano 1947, gracias a Manuel Chamoso Lamas. No interior repousan os restos de Antón Losada Diéguez e nun panteón do exterior os de Manuel Chamoso Lamas. Boborás e Carballiño organizan este premio alternativamente, contando co apoio da Deputación. Consisten nunha peza escultórica de Acisclo Manzano e na dotación de 6.000 euros para cada modalidade

Carlos Rodríguez: “Quizais sexa o momento de incrementar a contía”

Carlos Rodríguez Calvo traballou de periodista no ámbito estatal, autonómico e local, e na administración autonómica e local. Foi finalista do Premio de Novela Fernando Lara e publicou “El hombre blanco del río Nieva”.

Pregunta.Que supón ser mantedor do Premio Antón Losada?

Respuesta.Un orgullo e un honor, sobre todo nesta corenta edición que coincide co corenta cabodano da morte de Manuel Chamoso Lamas, que foi alumno de Losada Diéguez en Pontevedra.

P.Que aporta este premio á literatura e á investigación?

R.Certo prestixio, pois é un dos poucos certames que premian obras publicadas, e hai autores e autoras que agradecen o galardón para dar maior difusión aos seus traballos.

P.Tras corenta anos é suficiente a dotación económica deste premio?

R.O importante non é a contía económica, senón o valor engadido da súa traxectoria, pois ao longo destes corenta anos premiou aos máis importantes escritores e investigadores en moi diversas disciplinas. Con todo, quizais sexa o momento de incrementar a contía, por exemplo implicando á Consellería de Cultura, que é unha institución que tamén debería figurar no padroado, ao igual que os concellos do Carballiño e Boborás e a Deputación.

P.En que está traballando actualmente no eido literario?

R.Nunha novela entre O Carballiño e Arxentina, a onde emigraron moitos paisanos.