O Antón Losada Diéguez premia obras de Manuel Rivas e Alberto Pombo

Creación Literaria e Investigación e Ensaio

A casa consistorial do Carballiño acolleu a reunión e o fallo do xurado do XL Premio Antón Losada Diéguez, que premiou a Manuel Rivas na categoría de Creación Literaria e a Alberto Pombo en Investigación e Ensaio, sendo a entrega dos premios o 14 de xuño en Moldes (Boborás).

Reunión do xurado do XL Premio Antón Losada Diéguez, onte no Carballiño. | La Región

A casa consistorial do Carballiño acolleu onte a reunión e o fallo do xurado do XL Premio Antón Losada Diéguez, un certame literario anual convocado polos Concellos de Boborás e O Carballiño, e dotado con 6.000 euros para cada unha das dúas categorías recoñecidas por esta distinción.

O xurado acordou por unanimidade conceder o galardón deste ano na modalidade de Creación Literaria á obra de Manuel Rivas “Tras do ceo”, mentres que na categoría Investigación e Ensaio foi distinguido o libro de Alberto Pombo “Verso e acorde. Relacións entre a literatura galega e a música pop (1950-2000)”.

Respecto da novela de Manuel Rivas, o xurado valorou a súa “calidade literaria e lingüística que, recuperando elementos xa clásicos na produción do autor, constrúe un universo narrativo absolutamente actual”.

Sobre a obra de Alberto Pombo, sinalaron a súa contribución á “outra música”, ao traer á luz a relación entre “a música popular (pop, rock, punk, heavy metal, bravú) - e a literatura galega”.

A entrega dos premios aos novos galardonados co Premio Antón Losada Diéguez está previsto que se celebre o vindeiro 14 de xuño en Moldes (Boborás).

Contenido patrocinado