Tarde literaria no Zoco, en Carballiño, con Cesáreo Sánchez

“Carballiño está situado nun cruce de camiños e polo tanto non hai mellor lugar para presentar este libro, porque Cesáreo Sánchez Iglesias é un poeta de camiño e de encrucilladas”. Quen así fala é Felipe Senén, quen se achegou a nosa vila para asistir á presentación do libro de poesía “O rumor do distante”. Senén presenta a Cesáreo como “un dos máis grandes promotores culturais da nosa terra agora mesmo, sendo herdeiro de Nós e de Otero Pedraio, na dignificación da nosa terra”. Nun momento no que a tendencia é percorrer o camiño doado, Cesáreo fai unha poesía do sentimento, na era dos egos e de ausencia de diálogo, centrándose na relación entre paisaxe e paisanaxe, según Senén.

A presentación, que tivo lugar no espazo cultural O Zoco, reuniu na tarde de onte a un bo grupo de persoas. Desfrutouse da poesía que recolle o “Rumor do distante” pero tamén en gran medida das explicacións do seu autor en canto á orixe das mesmas.

Cesáreo Sánchez indicou que “este libro ten a súa orixe aló por principios deste século, cando eu era responsábel de patrimonio da Consellería de Cultura. Descubrín daquela que había unha parte do noso patrimonio que semellaba estar esquecida, e non era outra que os camiños”. Proseguía Cesáreo dicindo que “xa Cunqueiro despertara en min unha certa inquietude nese eido a través dunhas xornadas sobre os camiños galegos, que me levaron a ver os camiños, tantos históricos, culturais ou xacobeos, como espazos para compartir, que levan vida, pensamento e riqueza cultural”.

Máis aló da obra que veu a presentar, que se inspira e transcorre polos camiños, o poeta mostrou a súa preocupación pola parte patrimonial dos mesmos. Esas corredoiras que todos coñecemos e que proveñen xa de rutas celtas ou romanas, que permaneceron por centos de anos sen alterar, e que, para o autor do “Rumor do distante”, é moi importante preservar.