O CEIP de Cenlle expón un mural pola igualdade de xénero

O colexio CEIP Carmen García Carrasco de Cenlle ten exposto un mural que promociona a igualdade de xénero entre mulleres e homes. Con tal motivo, recibiu onte a visita do delegado territorial, Manuel Pardo, acompañado da alcaldesa, Rebeca Sotelo.

O delegado territorial explicou que esta expresión artística foi unha das iniciativas beneficiadas polas dúas liñas de axudas dirixidas ás asociacións de nais e pais, que a Consellería de Política Social e Igualdade puxo en marcha para a promoción da igualdade e loita contra a violencia de xénero no seo da comunidade educativa. Neste senso, lembrou que estas achegas de preto dun millón de euros abranguen un total de 185 centros de toda Galicia.

Manuel Pardo subliñou que o obxectivo destas actividades é reforzar a sensibilización e prevención neste eido, poñendo o foco nos máis pequenos e a súa contorna. Ademais, sinalou que é especialmente importante que estas iniciativas se desenvolvan tamén nos municipios máis rurais.

Segundo apuntou, a promoción da igualdade é importante entre as xeracións moi novas porque son a base para acadar unha sociedade libre de violencia contra as mulleres.