Nova presentación do libro “Nomes do Ribeiro”

No acto participarán: César Llana, director do museo; Rita Abraldes, profesora de galego; Xosé Carballido, enxeñeiro agrícola, experto en viticultura; Secundino Lorenzo, profesor do Instituto de Ribadavia entre 1968 e 1977, e o autor, Frutos Fernández.

O acompañamento musical do acto correrá a cargo do grupo Ronsel de Vigo.

A primeira edición deste libro, xa esgotada, fora realizada polo Instituto de Estudios Carballiñeses, dirixido por Avelino Muleiro, no ano 2007. A nova edición, da Editorial Andavira, ademais do estudo dos topónimos ribeiraos que contiña a primeira, inclúe un completo e novidoso estudo sobre os nomes das castes de uvas características de Galicia (godello, treixadura, torrontés, ...), campo totalmente inédito nesta Comunidade autónoma.

O libro tamén se amplía co estudo etimolóxico e semántico dalgúns dos vocábulos máis característicos do Ribeiro como cavadura, culeiro ou moio, entre outros.

O acto terá lugar hoxe, ás 20,00 horas, no Museo Etnolóxico de Ribadavia.

Ademais de “Nomes do Ribeiro”, Frutos Fernández ten outras publicacións como “Historia de San Clodio” e “Toponimia do Carballiño”.