O PP reclama que se mellore a fosa colectora de As Chabolas

O grupo municipal do PP de Ribadavia afirma que a fosa de augas residuais de As Chabolas continúa sen acondicionar, pese ao compromiso do goberno municipal. Engade que un regueiro de auga mesturada con lodos verque de xeito absolutamente descontrolado cara ao exterior da fosa.

No pasado mes de decembro, o PP rexistrou un escrito instando ao goberno a acondicionar e asegurar, de xeito inmediato, a fosa colectora, que recolle tanto augas pluviais como fecais da localidade e que está "nun estado de abandono absoluto", segundo afirma. Engaden os populares que "existen arquetas sen tapa que fácilmente poden provocar un accidente ou a caída dalgún animal. Ademais, a fosa non está correctamente selada e as augas e lodos verquen de xeito descontrolado cara ao exterior".

O portavoz, César Fernández, anuncia que "formularemos no pleno unha pregunta para coñecer as razóns polas que non se ten feito nada a día de hoxe a pesar de que o alcalde tiña manifestado a intención de resolver o problema e cando ten pensado actuar para darlle unha solución a esta cuestión".