Impulso promocional para a Feira do Pemento de Oímbra

TURISMO DE GALICIA

Esta Festa de Interese Turístico Galego que exalta o pemento de Oímbra recibe 4.000 euros da Xunta para a súa difusión

Primo Rivero, Manuel Pardo, Ana María Villarino, Lorena Macía e Domingo Rodríguez, co cartaz deste ano. | La Región

A menos dun mes para que Oímbra celebre a XXVIII edición da súa emblemática Feira do Pemento, o domingo 3 de agosto, a vila vén de recibir un importante pulo por parte da Xunta.

Esta celebración, que exalta o produto local por excelencia, foi beneficiaria da convocatoria do ano pasado das axudas para a promoción das Festas de Interese Turístico de Galicia, con 4.000 euros da Axencia de Turismo de Galicia, que servirán para seguir dando a coñecer esta xornada gastronómica e festiva.

O delegado territorial, Manuel Pardo, xunto coa alcaldesa, Ana María Villarino, e outros concelleiros do grupo do goberno, presentaron o cartaz da edición deste ano.

Pardo puxo ademais en valor que celebracións como a Feira do Pemento de Oímbra “impulsan un turismo auténtico e sostible” e ao mesmo tempo son “un factor de crecemento da economía que aposta polo equilibrio territorial e loite contra o despoboamento”.

Convocatoria de axudas

O delegado lembrou que Turismo de Galicia destinou 108.000 euros ás 27 festividades de interese turístico galego de Ourense, e que a convocatoria para este ano está aberta ata o vindeiro 11 de xullo.