Oímbra mellora os seus servizos públicos de atención “de 0 a 100 anos”

O Concello de Oímbra traballa, en colaboración coa Xunta, en mellorar os servizos públicos que presta, cunha atención que “vai dos 0 aos 100 anos”, como lembrou a alcaldesa, Ana María Villarino.

Con ese obxectivo, Perfecto Rodríguez, xerente do Consorcio Galego de Servizos de Igualdade e Benestar, desprazouse este venres ata a localidade para anunciar unha serie de convenios neste senso.

Por unha banda, o centro de día oimbrao, que presta dende 2008 un servizo “excepcional” ás persoas maiores e dependentes do concello, así como facilita a conciliación das súas familias, recibirá un investimento da Xunta de 21.000 euros. Con esta achega remodelaranse os teitos dos andares inferiores e cambiarán as baixantes e os caleiros exteriores para mellorar a recollida da auga.

Tamén se pintarán as paredes das zonas principais e renovaranse os estores, co obxectivo de facer os espazos máis confortables. Ademais, esta achega económica permitirá adquirir novas cadeiras e televisores.

Rodríguez e Villarino tamén acordaron no encontro outro convenio por importe de 13.100 euros para dotar á piscina pública dun elevador hidráulico, co fin de axudar a tódalas aquelas persoas con mobilidade reducida que buscan desfrutar deste equipamento municipal, sen ter que depender das súas familias ou dos socorristas.

A mandataria local definiu esta dotación como “novidosa”, ao reforzar a accesibilidade dos usuarios á piscina “de xeito autónomo”.

Reposicións na escola

A escola infantil, que goza dunha grande “demanda”, recibirá tamén algunhas actuacións e reposicións aínda por anunciar, grazas ao modelo de cofinanciación entre Xunta, Consorcio e os concellos.