A maxia da Furgoteca atrae a lectores de tódalas idades

A Furgoteca, unha auténtica biblioteca sobre rodas, botou a andar en 2023, hai xusto dous anos. Nun primeiro intre, esta iniciativa da Consellería de Cultura, Educación, FP e Universidades xurdiu cun programa piloto en catro comarcas de Lugo e Ourense.

Román Rodríguez, titular de Cultura daquela, afirmou que a proposta nacía co fin de “garanter o acceso á cultura a toda a cidadanía”, con especial fincapé nos municipios do rural con moitos núcleos de poboación illados, e cuxa veciñanza ten maior dificultade para desprazarse á biblioteca local.

Daquelas dúas rutas iniciais, a correspondente á nosa provincia abrangue un total de tres comarcas (A Limia, Conso-Frieiras e Monterrei), sendo esta última á que máis concellos chega, dúas veces ao mes: Castrelo do Val, Cualedro, Laza, Monterrei e Oímbra. Posteriormente creouse unha nova, denominada occidental, que percorre tamén Terra de Celanova.

Para conmemorar esta efeméride da coñecida como “ruta sur” de Ourense, a Xunta organizou onte un espectáculo de maxia e humor a cargo do vianés Mago Teto coincindo coa visita da Furgoteca ao CEIP Plurilingüe de Oímbra, a localidade “sede” deste servizo, e na que se almacena o vehículo.

Os 60 alumnos deste colexio, así como profesores, equipo docente, membros da Consellería e a mandataria local, Ana Villarino, desfrutaron dos numerosos trucos de cartas e outras invencións do mago e ilusionista, que marabillou á cativada e fixo rir por igual aos adultos. O show incluíu tamén grandes nomes das nosas letras, como Rosalía de Castro ou Manuel Rivas.

Máis alá de libros

Para Isabel García, responsable desta ruta da Furgoteca dende hai seis meses, a xente aínda está a coñecer moitos dos servizos que ofrecen: “Ademais de libros, tamén prestamos tablets, videoxogos e consolas portátiles, altofalantes e outros materiais informáticos”. Tampouco faltan nin as revistas nin a prensa como La Región, dispoñibles a diario.

Sobre os pequenos lectores, a encargada da biblioteca asegura que os máis novos “desfrutan sobre todo da experiencia, de entrar e rebulir en todo o que temos, aínda que logo teñan as súas preferencias de cómics ou libros de influencers”.

Respecto a se hai un perfil de usuario da Furgoteca, García cre que “non existe un prototipo nin unha idade concreta”. Sobre as preferencias, afirma que “demandan moita novela de intriga e de misterio, e os máis afeccionados piden as últimas novidades”.

Os máis maiores tamén son ávidos lectores, e agardan con “impaciencia” as visitas mensuais desta biblioteca móbil, que ademais de a colexios achega ás casas do maior e aos centros de día a paixón pola lectura.