Adeus ao paso de Peliquín “de maneira inminente”

O subdelegado do Goberno en Ourense, Eladio Santos, ve factible emprazar ao Concello de Ourense a presentar un proxecto alternativo para facer un túnel soterrado onde se atopa o actual paso a nivel de Peliquín, pero dixo que non hai marcha atrás en canto ao derrubamento do paso a nivel, xa que está adxudicado.

Así o manifestou na reunión cos grupos municipais e a Asociación de Veciños Peliquín-Catro Camiños de Ourense sobre proxectos complementarios á supresión do paso a nivel que executará o ADIF en Peliquín para garantir a seguridade das persoas. Na reunión, abordouse a posibilidade de trasladarlle ao Concello a petición de facer un novo proxecto para un paso inferior na vía do tren, “xa que a Administración local consensuou os traballos actuais co ADIF”, puntualizou Santos, quen lembrou que “a seguridade é unha prioridade para o Goberno” e, por iso, o paso a nivel será suprimido “de xeito inminente, pois a actuación xa está adxudicada”.