El Campus de Ourense ofrecerá dous novos másters: vehículos autónomos e traballo social

O Consello de Goberno da Universidade de Vigo aprobou onte a proposta de novas titulacións para o curso 2026/2027, dúas delas no Campus de Ourense: o máster en Traballo Social, que será virtual pero coordinado desde Ourense; e o novidoso máster en Vehículos autónomos, que será compartido pola escola ourensá de Aeronáutica con Vigo. Agora, estas propostas serán remitidas para a súa aprobación á Consellería de Educación.

En total, o Consello de Goberno da UVigo propuxo catro novos títulos de mestrado. Por unha banda, o Máster en en xeomática avanzada e intelixencia xeoespacial, adscrito á Escola de Enxeñaría Forestal do campus de Pontevedra.

Por outra banda, estrearase o Máster en traballo social no ámbito sanitario, vinculado á Facultade de Educación e Traballo Social de Ourense, de carácter virtual e compartido con outras sete universidades españolas, que ofrecerá 8 prazas na UVigo.

Ademais, e o máis novidoso, Ourense acollerá o Máster en vehículos autónomos, adscrito á Escola de Enxeñería Industrial, pero que terá tamén docencia na Escola de Enxeñaría Aeronáutica e do Espazo ourensá. Neste caso, será un modelo híbrido presencial e virtual, que ofrece 8 prazas na UVigo, e outra tantas na USC e na Universidade da Coruña.

Xa por último, aprobouse o mestrado de Química teórica e modelización computacional, adscrito á Facultade de Química en Vigo.

O Consello de Goberno aprobou tamén a tramitación dunha nova proposta de títulos de grao: Enxeñaría de Tecnoloxías Navais para a Defensa, que se impartirá no Centro Universitario da Defensa.

Así mesmo,aprobouse por asentimento a modificación substancial do grao Relacións Internacionais, que Ourense comparte con Ferrol, para pasar no curso 26/27 dun grupo compartido de 45 prazas a dous grupos de 30 prazas cada un, dada a boa acollida destes estudos.

A UVigo suma á súa oferta a Ciberintelixencia

Durante a sesión aprobouse tamén a posta en marcha de dous novos mestrados de formación permanente -complementarios á oferta oficial de másters da UVigo – para o curso 2025/2026: Ciberintelixencia e ciberoperacións en sectores estratéxicos para a seguridade nacional e Enfermaría de práctica avanzada en urxencias e coidados intensivos.

O primero deles está irixido a formar a unha nova xeración de profesionais capaces de afrontar os desafíos do ciberespazo e garantir a seguridade e defensa en sectores estratéxicos, en colaboración coa multinacional española Indra.No caso do de Enfermaría de Práctica Avanzada en Urxencias e Coidados Intensivos realizarase en colaboración co Hospital Ribera-Povisa.