O Premio Ourensanía 2026, para De Ruada e Marita Souto

A coral De Ruada e a investigadora Marita Souto -esta última a título póstumo- serán as galardoadas cos Premios Ourensanía 2026. O xurado presidido polo presidente da Deputación de Ourense, Luis Menor, acordou por unanimidade a concesión de ambas as distincións durante unha reunión celebrada no Pazo Provincial.

A decisión fundamentouse no compromiso dos dous premiados coa provincia. Menor destacou que representan “dúas maneiras extraordinarias de exercer a ourensanía”, ben a través da preservación e transmisión da cultura galega, no caso da entidade musical, ou mediante a proxección internacional do patrimonio termal, no caso da científica.

No referente ao Premio Ourensanía, o xurado valorou a traxectoria de máis dun século da coral De Ruada, institución fundada en 1918 e considerada unha referencia fundamental na defensa e divulgación da música, o canto, o baile e a tradición popular. O ditame subliña o seu papel como embaixadora de Ourense e Galicia, así como a súa capacidade para adaptar as súas raíces aos novos tempos.

Pola súa banda, o Premio Ourensanía de Honra recoñece o legado de María Generosa “Marita” Souto Figueroa. Química, farmacéutica, doutora e docente, o seu traballo foi pioneiro na análise individualizada das fontes termais ourensás, introducindo rigor científico no estudo destas augas, incluíndo investigacións sobre a presenza de selenio. O seu interese polo termalismo xurdiu na década dos oitenta, época na que exercía como directora do IES nº 1 do Carballiño e coñeceu as augas de Caldas de Partovia.

A entrega dos galardóns celebrarase no Teatro Principal de Ourense o 10 de novembro, na véspera do San Martiño, patrón da cidade. Durante o acto, entregaranse as copias das actas oficiais e unhas figuras de bronce creadas polo escultor Xosé Cid.

O legado de dúas figuras que son indiscutibles

Tanto a coral De Ruada como Marita Souto contan cunha traxectoria que xa fora obxecto de destacadas distincións. A entidade musical posúe importantes recoñecementos previos, entre os que figuran a Medalla de Ouro da Provincia de Ourense, a Medalla de Galicia, o Pedrón de Ouro, a Medalla de Ouro da Cidade de Ourense, o Premio Trasalba e o Premio Otero Pedrayo.

A proxección científica e académica de Marita Souto acadou, pola súa banda, unha notable dimensión internacional. Exerceu como delegada en España da Federación Mundial de Hidroterapia e Climatoterapia e foi membro da International Society of Medical Hydrology and Climatology. Ademais, no 2025 incorporouse como académica de número da Real Academia Europea de Doutores.