A cultura galega segue viva alén das fronteiras coas Escolas Abertas

A música e o baile son dous compoñentes fundamentais da identidade galega, non só dentro da propia xeografía da comunidade autónoma, senón que tamén teñen contribuído a consolidar esa mesma identidade ó longo da historia a través dos cinco continentes. Como escenario, os centros galegos teñen sido o epicentro de conservación dun pobo emigrante que perdura de xeración en xeración.

Proba desta conservación é o programa Escolas Abertas, impulsado pola Consellería de Emprego, Comercio e Emigración a través da Secretaría Xeral da Emigración. Trátase dunha ponte de conexión entre Galicia e a diáspora que permite seguir preservando, transmitindo e difundindo a cultura e tradicións galegas. Un total de 44 alumnos e alumnas procedentes de 11 países de América e Europa, participaron na edición deste ano. Dende Arxentina, Uruguay, Cuba, Brasil, Venezuela, México, Chile, Costa Rica, Alemania, Estados Unidos e outros puntos da xeografía española proceden os mozos e mozas que onte participaron na gala de clausura desta iniciativa que leva formado xa a máis de 2.000 persoas dende os seus inicios.

Todos eles son persoas que imparten clases de baile, música e cultura galegas nos centros galegos do exterior. O pasado día 4 deste mes chegaron a Galicia para convertérense en alumnos recibindo formación especializada e cualificada nos ámbitos técnico e didáctico nas modalidades de baile tradicional, canto popular, pandeireta, confección de traxes tradicionais, gaita e percusión.

Convivencia e experiencias

Pero o programa Escolas Abertas non é meramente formativo, senón que constitúe tamén para os participantes unha oportunidade de coñecer a outros galegos da diáspora, compartir experiencias nestes días de convivencia e fraguar lazos de irmandade.

Tras recibir os diplomas acreditativos durante a mañá no Centro Superior de Hostelería de Galicia en Santiago de Compostela, pola tarde trasladáronse a Ribadavia para participar no acto de clausura, que estivo presidido polo secretario xeral da Emigración, Antonio Rodríguez Miranda, eloxiando o traballo realizado tanto polos participantes como polos seus formadores, todos eles profesionais de recoñecida traxectoria en Galicia. O evento constituíu un éxito rotundo de celebración da música, a danza e as tradicións.

Alí, Antonio Rodríguez Miranda destacou a importancia deste programa para a promoción e preservación da cultura galega, tanto dentro como fóra das fronteiras galegas. “A entrega e a paixón que estes participantes amosan pola nosa cultura é un claro exemplo de como se pode manter viva a esencia galega en calquer parte do mundo”, afirmou.

Deste xeito, os alumnos tiveron ocasión de amosarlle ó público todo o que aprenderon nestes máis de dez días de formación nos cursos de especialización. Ademais das actuacións de música e baile, os asistentes puideron comprobar o traballo realizado cun desfile cos traxes tradicionais confeccionados durante os obradoiros e serviron para resaltar a diversidade e a riqueza da cultura galega, promovendo a súa transmisión de xeración en xeración.

Un ano máis, a gala de clausura do programa Escolas Abertas serviu para reafirmar a importancia desta iniciativa como ferramenta de formación especializada para as entidades galegas do Exterior, fortalecendo os vínculos culturais entre Galicia e as súas comunidades dispersas polo mundo.

Ribadavia converteuse nun escenario da cultura galega, que seguirá traspasando fronteiras da man do compromiso e dedicación dos participantes do programa Aulas Abertas.

Apoio á comunidade galega do exterior

O programa Aulas Abertas é unha das múltiples iniciativas que a Secretaría Xeral da Emigración desenvolve para apoiar ós galegos do exterior. Durante a entrega de diplomas, o conselleiro de Emprego, Comercio e Emigración, José López, sinalou a importancia da Estratexia Galicia Retorna 2023-2026, que promove programas dirixidos á integración sociolaboral daqueles que decidan retornar á comunidade, ben como emprendedores ou como traballadores. Neste sentido, sinalou que esta planificación é posible grazas ao traballo do goberno galego para manter os lazos cos galegos no exterior. Este esforzo, especificou, inclúe o fortalecemento de programas como as Escolas Abertas.

Outro programa destacado polo conselleiro é Retorna Califica Emprego, que ofrece empregos de calidade cos que volver a Galicia, complementados con formación e axudas para establecerse. Tamén se referiu, entre outras iniciativas, ás Bolsas de Excelencia Mocidade Exterior para fomentar o retorno de mozos altamente cualificados.