A escritora ourensá Chus Pato recibe o IV Premio das Letras Galegas Vivas

RECOÑECEMENTO Á SÚA TRAXECTORIA

O xurado escolleu por unanimidade a escritora ourensá Chus Pato entre 26 candidaturas válidas e destacou a calidade a súa e o seu compromiso coa lingua, a cultura e a identidade galegas

A escritora ourensá Chus Pato galardoada co IV Premio das Letras Galegas Vivas.
A escritora ourensá Chus Pato galardoada co IV Premio das Letras Galegas Vivas. | La Región

A escritora ourensá María Xesús Pato, Chus Pato, foi galardoada co IV Premio das Letras Galegas Vivas, concedido pola Biblioteca Sabela Labraña, integrada na Asemblea Cultural Galega de Barcelona (ACGB). O xurado decidiu por unanimidade outorgarlle este recoñecemento pola calidade da súa obra literaria e pola súa traxectoria de compromiso coa lingua e a cultura galegas.

O galardón, de carácter honorífico e sen dotación económica, pretende recoñecer cada ano a unha escritora ou escritor vivo en lingua galega. A iniciativa busca poñer en valor as traxectorias literarias e a implicación social e cultural dos autores sen agardar ao seu falecemento.

Un premio entre 26 candidaturas

Nesta cuarta edición presentáronse 37 candidaturas, das que finalmente 26 cumpriron os requisitos establecidos pola organización. Tras analizar a traxectoria das persoas candidatas, o xurado decidiu por unanimidade que o premio correspondese a Chus Pato.

Entre os criterios valorados están tanto os méritos literarios como o compromiso cultural, social e político. A convocatoria presta ademais especial atención á presenza das mulleres nas letras e na cultura galegas.

O xurado estivo integrado polo crítico literario Xesús González, o locutor Suso Mon, a escritora Pura Salceda, a articulista Lluïsa Soaz e Sofía Tarela, con Amador Castro como representante da Biblioteca Sabela Labraña, con voz pero sen voto.

Unha traxectoria ligada á literatura e ao activismo

Chus Pato, licenciada en Xeografía e Historia pola Universidade de Santiago de Compostela, exerceu como docente de secundaria ata a súa xubilación en 2020. Ao longo da súa traxectoria combinou a creación literaria coa participación en diferentes iniciativas culturais e sociais.

Foi unha das fundadoras de ERGA, militou na Unión do Pobo Galego e encabezou en varias ocasións a candidatura pola provincia de Ourense da Fronte Popular Galega. Tamén forma parte de organizacións e entidades vinculadas á literatura e á cultura galegas.

En 2016 foi nomeada académica de número da Real Academia Galega. Ademais, desde 2015 forma parte do padroado da Fundación Euseino? e está vinculada tamén ás fundacións Rosalía de Castro e Uxío Novoneyra.

A súa voz foi incorporada en 2015 ás gravacións do Woodberry Poetry Room da Universidade de Harvard, que reúne testemuños de destacadas figuras das letras universais.

Desde o punto de vista literario, o xurado destacou a súa capacidade para renovar a linguaxe poética e para explorar as relacións entre linguaxe, historia, memoria e identidade. A súa obra aborda tamén diferentes dimensións da identidade individual, de xénero, nacional e histórica.

Un recoñecemento que se entregará nos vindeiros meses

A Biblioteca Sabela Labraña organizará nos próximos meses diferentes actos arredor da figura e da obra de Chus Pato, entre eles a entrega do premio.

O recoñecemento consistirá nunha escultura do artista Anxo Baranga, inspirada no mundo dos libros e concibida como símbolo do coñecemento, a memoria e a resistencia cultural.

Co Premio das Letras Galegas Vivas, a entidade pretende tamén trasladar ás institucións galegas a proposta de crear un recoñecemento semellante que permita celebrar en vida as figuras da literatura galega, como complemento ao Día das Letras Galegas.

Contenido patrocinado

stats