Liberar a dor en forma de expresión artística

Crear vínculos, aferrarse á vida, existir e compartir. Isto é o que fan os pacientes de psiquiatría de Ourense como parte da iniciativa “ArtEspida” de Piñor. Un espazo creativo no que a arte funciona como expresión e terapia ante a dor psíquica, a través da creación de obras nas mans dos propios pacientes.

Nado como un proxecto clínico terapéutico libre de ataduras e estigmas, esta iniciativa traspasou as fronteiras galegas para reunirse no centro Joaquín Roncal de Zaragoza xunto a outros dous colectivos que promoven a creación de autores con diversidade psíquica. En forma de exposición, apóstase comunmente pola singularidade e o respecto polo suxeito, inspirándose na psicanálise. “ArtEspida” vai máis alá de simplemente “ensinar a pintar”, permitindo a todos os pacientes que compartan e expresen todo o que levan dentro. Lugares onde a vida acontece, onde a arte nace sen moldes, desde o humor, o vínculo e a liberdade. Un proxecto que abre as súas portas tamén a pacientes non ingresados que amosen interese en participar.

No marco do Día Internacional da Arte o Servizo de Psiquiatría da área sanitaria de Ourense, aproveitou onte esta iniciativa para lembrar o valor da expresión artística como exemplo para aliviar o sufrimento psíquico en todas as culturas ou, como aseguran dende a Organización das Nacións Unidas para a Educación, a Ciencia e a Cultura, como “un medio para que as persoas poidan expresar ideas, conciencia social, críticas e reflexións, utilizando distintos recursos plásticos, sonoros ou lingüísticos”.

Escoitar cos ollos

Xa en 2023, o Centro Cultural Marcos Valcárcel foi espazo dunha primeira mostra de “ArtEspida”. Baixo o título de “Arte e Loucura: Escoitar cos ollos”, un percorrido pola arte como resposta ante a dor psíquica realizada nos últimos 60 anos da historia asistencial da psiquiatría ourensá.