Máis de 41.000 persoas na provincia de Ourense padecen migraña

Ourense/ Na xornada de onte celebrouse o Día Internacional da Acción contra a Migraña, unha enfermidade que afecta a miles de persoas na provincia, co obxectivo de dar visibilidade a unha patoloxía que sofre de banalización e conseguintemente infradiagnóstico.

A migraña é a enfermidade neurolóxica máis frecuente e a máis común nas consultas do Servizo de Neuroloxía da Área Sanitaria de Ourense, Verín e Valdeorras. Por iso, no Hospital Universitario de Ourense contan cunha consulta monográfica semanal, atendida polas especialistas María Pardo e Nabil Sabbagh, que en 2024 atendeu a 404 persoas con migraña grave ou crónica e serve de enlace cos pacientes en temas de formación e administración da medicación.

Na provincia de Ourense, máis de 41.000 persoas poderían padecer esta doenza, que é a primeira causa de discapacidade en adultos menores de 50 anos. Entre os pacientes que sofren esta enfermidade existe unha importante diferenza de xénero en canto a prevalenza, xa que a Sociedade Español de Neuroloxía (SEN) estima que afecta ao 18% das mulleres e ao 9% dos homes.

En Ourense supón que máis de 28.000 mulleres e 13.000 homes padecen migraña. As especialistas do Hospital Universitario de Ourense, María Pardo e Nabil Sabbagh, destacan que ata o 40% dos enfermos non están diagnosticados, e pola súa banda, o 50% seguen un tratamento inadecuado. En moitos casos, a migraña está reducida a unha dor de cabeza sen importancia. Esta minusvalorización leva a automedicación, aumentando polo tanto o risco de cronificación da enfermidade.

Síntomas da migraña

Esta afección maniféstase a través dunha intensa dor pulsátil a un só lado do cranio, acompañado de molestia ante a luz e ao ruído, e incluso náuseas, vómitos, e as veces molestias aos cheiros e o movemento. Estes efectos tamén poden estar condicionados por unha orixe xenética complexa, na que inflúen factores ambientais ou hormonais. Os profesionais afirman que o principal factor de protección e prevención, ante a cronificación, é o diagnóstico e un tratamento adaptado ás características da afección, para loitar así contra a automedicación e os mitos.

Para evitalos, desde o Servizo de Neuroloxía animan aos pacientes a acudir en primeiro lugar ao médico de atención primaria, para unha valoración e un primeiro tratamento. Unha migraña grave pode producir dor durante 15 días ao mes.