O OUFF presenta a nova Calpurnia deseñada por Manuel Buciños

Ourense/ A trixésima edición do Ourense Film Festival inaugura este ano numerosas novidades. Unha delas é o deseño da tradicional Calpurnia que se entrega aos premiados. Na mañá de onte, o Centro Cultural Marcos Valcárcel foi testemuña da presentación da escultura máis emblemática do festival cinematográfico, que se levará a cabo na cidade desde o 26 de setembro ata o 5 de outubro.

Manuel Buciños foi o encargado de dar forma ao novo deseño. O escultor, nado en Carballedo en 1938, é unha das figuras clave da arte galega contemporánea. Non é a primeira edición que Buciños é o responsable de crear a figura do galardón do OUFF, xa que o fixo por primeira vez no 1997. Na presentación participaron o vicepresidente segundo e deputado de Cultura da Deputación de Ourense, César Manuel Fernández Gil; o director artístico do festival, Óscar Doviso; o director técnico, Marcos Vázquez, e o escultor Manuel Buciños.

Neste novo deseño, Buciños afirmou que innovou lixeiramente, para facer unha nova imaxe da Calpurnia que non tivese relación coa xa existente. En relación a outros premios de festivais cinematográficos, a Calpurnia caracterízase por ser auténtica e única, xa que é unha obra de arte que conta coa implicación directa do artista, proporcionándolle un valor especial.

Óscar Doviso, director artístico do OUFF, sinalou aspectos relevantes sobre o redeseño que “agora está perfectamente definida en primeiro termo, porque a figura que había era un plano xeral e ímonos achegando un pouco máis a verlle ese rostro á Calpurnia”.

Nesta presentación, Buciños afirmou que a nova escultura era un recordo da súa infancia, “porque o importante para min no cine non eran os directores, o importante eran as actrices”. Deste xeito, a súa inspiración provén das “caras clásicas das actrices”, por iso buscou realizar unha “cara interesante, bonita”.

“Baseeime na miña xuventude, unha época na que o cinema me chamaba especialmente a atención, era o único que me distraía”

Buciños ten unha forte ligazón coa arte cinematográfica desde a súa infancia e adolescencia. “Para facer este novo deseño baseeime na miña mocidade, xa que era unha época na que o cinema me chamaba especialmente a atención. Agora, ségueme gustando moito. Ademais, mentres estudaba en Madrid o grao de Belas Artes e traballaba para poder manterme, o cinema era o único que me distraía”, lembraba Buciños.

Esta edición serán tres os galardoados que se levarán esta Calpurnia. “Non supuxo ningún esforzo realizar este novo deseño. É unha obra que vai viaxar por todo o mundo”.