O OUFF estrea Agarimo

O OUFF estrea a sección Agarimo, que servirá para homenaxear a figuras relevantes e inesquecibles do sector cinematográfico, así como o seu legado. Nesta primeira celebración, o festival recoñece a importancia e labor da cantante e actriz Angela Lansbury, no centenario do seu nacemento, gañadora de seis premios Tony, un Óscar honorífico, seis Globos de Ouro, un Grammy e o título de Dama do Imperio Británico.

Angela Lansbury é considerada unha das grandes figuras da interpretación do século XX, cunha carreira que abarca máis de sete décadas no cine, teatro e televisión. En televisión, alcanzou fama mundial co seu papel de Jessica Fletcher na obra “Se ha escrito un crimen”, na que tamén participou como produtora executiva e creativa.

Desta forma, levarase a cabo un ciclo de tres películas: o 27 de setembro ás 19.30 horas no Teatro Principal proxectarase “Luz que agoniza”, o martes 30 de setembro ás 18.00 horas no Centro Cultural Marcos Valcárcel, “El mensajero del miedo” e o xoves 2 de outubro ás 18.00 horas no mesmo espazo que o anterior filme, “Muerte en el nilo”.

A sección de Agarimo tamén rendirá homenaxe á escritora Carmen Martín Gaite, coa proxección da obra “Emilia… parada y fonda”, o domingo 28 de setembro ás 22.00 horas no Teatro Principal. A escritora española foi galardoada co Premio Café Gijón, tras debutar na narrativa coa súa obra “El Balneario” e co Premio Nadal coa obra “Entre visillos”, que a situou como unha das principais narradoras da súa xeración.

Martín Gaite foi unha das voces máis destacadas da literatura española contemporánea. O acceso a estas sesións será libre e de balde. O festival dará comezo o 26 de setembro e finalizará o 5 de outubro, nestas semanas a cidade será o epicentro do sector cinematográfico.