Preto de 50 retornados iniciaron en Ourense o Camiño de Santiago

Un total de 42 mozos galegos do exterior selaron onte a súa compostela na Oficina de Turismo que a Xunta ten en Ourense. Procedentes de distintos países de América, como Argentina ou Cuba, estes rapaces participan no programa Conecta con Galicia no Camiño, co que puxeron rumbo a Santiago de Compostela, seguindo a Vía da Prata.

Na súa saída, estiveron acompañados polo secretario xeral da Emigración, Antonio Rodríguez Miranda, quen destacou que esta experiencia serviralles para “coñecer o rural galego, convivir coa nosa xente e conectar coas súas raíces e coas das súas familias”. Neste inicio de etapa tamén participou o delegado territorial da Xunta en Ourense, Manuel Pardo.

O programa Conecta con Galicia no Camiño, organizado pola Secretaría Xeral da Emigración en colaboración coa Dirección Xeral de Xuventude, reúne este ano a preto de 100 mozos de entre 18 e 21 anos de ata sete países distintos de América. O obxectivo da iniciativa é fortalecer os vínculos coa terra de orixe a través dunha experiencia vital, cultural e identitaria como é o Camiño de Santiago.

Co mesmo obxectivo de chegar a Compostela, outro grupo de participantes, neste caso aloxados na Residencia Xuvenil Altamar de Vigo, iniciaron tamén o Camiño que no seu caso seguirá a ruta Portuguesa. Ámbolos grupos de rapaces percorrerán un total de 100 quilómetros, repartidos en oito etapas, ata chegar ao seu destino: a catedral de Santiago.