Consulta todas as películas que se proxectan no 'Cine na Rúa'

A Deputación de Ourense organiza un programa de proxeccións ao aire libre en diferentes concellos ourensáns. O proxecto, chamado “Circuíto provincial de cine de verán 2025”, achegará o audiovisual a 30 municipios ourensáns. Dende a área de Cultura da Deputación ponse en valor a “cooperación” para levar a cabo este proxecto, destacando o apoio de Agadic, presidido por Jacobo Sutil, de Gadis e da organización do cine de verán, a través da figura de Xoán Mariño.

Cinco títulos para todos os públicos

As películas que se proxectarán ata o próximo 30 de setembro son: “+ Cuñados”, “As Neves”, “Antes de Nós – Castelao”, “Os demos de Barro” e “Chicken Run – Amanecer de los Nuggets”, contribuíndo á variedade de formatos e adaptándose a todo tipo de público. Ademais, varias das películas rodáronse en Ourense e contaron con apoio da Deputación de Ourense.

• “+ Cuñados”, a longametraxe proxectarase nos concellos de Barbadás, Maside, Nogueira de Ramuín, Celanova, Vilariño de Conso, O Bolo, Melón e Sarreaus.
• “As Neves” poderá verse en Viana do Bolo, Castrelo de Miño, Piñor, Avión, Montederramo e San Xoán de Río.
• “Antes de Nós -Castelao” estará en Verea, Vilar de Barrio, A Peroxa, Cartelle, Maceda, Ribadavia, Trasmiras e Vilar de Santos.
• “Os demos de Barro” exhibirase en Bande, Baños de Molgas e Allariz.
• “Chicken Run – Amanacer de los Nuggets” proxectarase en Boborás, Esgos, Paderne de Allariz, A Mezquita e Carballeda de Avia.