Protección Civil entrega as doazóns de 37 concellos

A rede de voluntariado de Protección Civil da provincia de Ourense fixo efectiva a entrega de alimentos non perecedoiros ao Banco de Alimentos. O acto tivo lugar no almacén que a entidade benéfica xestiona no polígono de San Cibrao das Viñas, coa presenza do delegado territorial da Xunta, Manuel Pardo, que acompañou a entrega do material recollido a través do servizo provincial de Emerxencias. A iniciativa, desenvolvida baixo o lema “Por un Nadal feliz para todos”, mobilizou a un total de 37 Agrupacións de Voluntarios de Protección Civil da provincia. Para a recolección, os voluntarios habilitaron puntos de entrega en edificios públicos como consistorios, centros de saúde e colexios, así como en supermercados e áreas comerciais.

Desde a Xunta, sinalaron que a campaña non se marcou un obxectivo cuantitativo de quilos, senón que buscou canalizar a solidariedade veciñal para apoiar ás familias máis vulnerables nestas datas. Manuel Pardo aproveitou a visita para agradecer o traballo “desinteresado e altruísta” dos voluntarios e confiou en que esta achega axude a “paliar as carencias dos menos afortunados”.

As agrupacións que participaron na recollida pertencen aos concellos de Allariz, Amoeiro, Avión, Baños de Molgas, Beariz, Os Blancos, Boborás, A Bola, Calvos de Randín, O Carballiño, Castrelo de Miño, Chandrexa de Queixa, Coles, Cortegada, Entrimo, Esgos, A Gudiña, Gomesende, O Irixo, Mancomunidade do Ribeiro, Manzaneda, A Mezquita, Montederramo, Nogueira de Ramuín, Paderne de Allariz, Piñor, A Pobra de Trives, Porqueira, San Cibrao das Viñas, San Cristovo de Cea, Sarreaus, A Veiga, Vilamarín, Vilar de Santos, Vilardevós, Xunqueira de Ambía e Xunqueira de Espadanedo.