Fin de rodaxe da 30 edición do OUFF coa premisa de “manter vivo ao cine”

Rematáronse os flocos de millo, toca prender as luces e levantarse das butacas. O Ourense Film Festival (OUFF) pechou onte a súa 30ª edición coa satisfacción de ter sido un ano ambicioso, no que, unha vez máis, se trouxo á cidade filmes de primeiro nivel que encheron as salas ao longo da última semana.

O Auditorio Municipal acolleu unha gala de clausura que estivo marcada pola emoción, pero na que non faltou humor e recoñecemento a grandes figuras do panorama cinematográfico. Volveu soar o OUFF Theme composto por Jose Manuel Cancela nesta edición, para dar paso a Lucía Rodríguez e Secun de la Rosa. Eles foron os encargados de conducir a cerimonia, cun patio de butacas que se desfixo en aplausos en varios momentos da noite.

O director artístico do festival, Óscar Doviso, subiu ao escenario para facer balance da súa primeira edición á fronte do OUFF. “Chegamos ó final dunha semana intensa, chea de emocións, descubrimentos e encontros”, destacou, insistindo en que esta é “unha viaxe compartida” a que toca “poñerlle punto e seguido”. “Foron días nos que Ourense se converteu nunha xanela aberta ao mundo, traendo historias descoñecidas e necesarias”, resaltou Doviso, que asegurou que a cidade “seguirá a ser unha casa para o cine”.

A estrela da noite

Un dos momentos máis agardados da noite foi a entrega da Calpurnia de Honra, que este ano recibiu o director e actor Daniel Guzmán, pola súa sólida traxectoria e a súa mirada comprometida co cinema social. “El cine ha dado sentido a mí vida, me hace muy feliz, aunque a veces pierda otras cosas”, recoñeceu emocionado o protagonista.

Proxectouse un vídeo sorpresa de Luis Tosar, quen lle dedicou unhas palabras de afecto e admiración. “Daniel é unha das persoas que logrou nesta industria da cinematografía un ingrediente, que as veces se volta en falta, que é a humanidade”, quixo subliñar o actor galego. O propio presentador da gala, de la Rosa, tamén quixo por en valor a figura de Guzmán, a quen lle debe a súa primeira oportunidade no mundo audiovisual.

Fíxose entrega dun total de 14 galardóns, que recoñeceron as visións de talentos galegos e tamén internacionais. Luis Menor felicitou aos gañadores e agradeceu o “gran traballo” da nova dirección do festival liderada por Óscar Doviso, e o apoio dos patrocinadores, entre os que se atopa La Región.

A noite contou tamén cunha actuación musical, que estivo a cargo de Luis Fercán, que contribuíu a manter a emoción e a atención do público ata o final da cerimonia. Para por o broche final proxectouse “La deuda”, a última película de Daniel Guzmán, que segue a liña social que busca transmitir o OUFF.