Sector primario e termalismo no I Congreso Transnacional

Ourense/Ester mércores deu comezo a celebración da primeira xornada do I Congreso Transnacional do Campus Auga da Xuventude Investigadora, Aquaxi´25. Ten lugar na Facultade de Ciencias, e conta coa inscrición de 150 persoas e 300 investigadores pertencentes a numerosos grupos de investigación das diferentes escolas e facultades ourensás, maioritariamente relacionadas co Campus Auga a través dos grupos de investigación e entidades ás que pertencen. “O comité organizador somos rapaces novos, ademais de contar coas colaboracións non puntuais do Campus de Ourense, vicerreitorías e director do Campus Auga”, afirma Iago Blanco, xestor.

Organizado polo Campus Auga, proxecto financiado pola Consellería de Educación, Ciencia, Universidades e Formación Profesional, tamén destaca a participación das tres universidades galegas e institucións lusas, como as universidades de Porto, Minho e Trás-os-Montes e Alto Douro, o Instituto Politécnico de Bragança e AquaValor.

Aquaxi´25 está especialmente pensado para persoal investigador en formación, tanto en etapas predoutorais como posdoutorais e persoas que inician a súa traxectoria científica. A iniciativa tamén está aberta a persoas cunha traxectoria investigadora consolidada, que desexan contribuír ao enriquecemento científico do encontro.

Na xornada de onte tratáronse temas como as funcións do solo e servizos ecosistémicos; economía e turismo termal; a xestión e uso das augas termais ou a biotecnoloxía alimentaria, entre outros.