SoildiverAgro marca a ruta para cambiar a agricultura europea

Desde 2019, 22 socios de sete países liderados pola Universidade de Vigo desenvolven o proxecto europeo SoildiverAgro co obxectivo de avanzar na adopción de novas prácticas e sistemas de cultivos que melloren a biodiversidade do solo. Este martes arrancou no campus de Ourense a súa asemblea de peche. Nela destacouse que SoildiverAgro remata o seu traballo marcando unha folla de ruta concreta, combinando datos científicos, ferramentas prácticas e propostas políticas, “para transformar a agricultura europea dende o solo”.

O proxecto centrouse “en trasladar á práctica agrícola e ao ámbito político os coñecementos xerados ao longo de anos de investigación, combinando ciencia, demostración en campo e participación activa do sector agrario”. Así, ao seu abeiro analizáronse 90 sistemas agrícolas europeos e desenvolvéronse unha serie de accións que permitiron avaliar, mellorar e aproveitar a biodiversidade do solo neles como aliada da produtividade agrícola.