Teófilo Edicións publica “Os soños de Daniel” para honrar a vida de Castelao

Ourense/O pasado mes de xullo, Teófilo Edicións lanzou o libro “Castelao entre nós, 75 anos despois”, do escritor ourensán Paco López-Barxas (Ponte Barxas, Padrenda) como homenaxe ao ilustre Alfonso Daniel Manuel Rodríguez Castelao, un dos pais do nacionalismo galego e figura clave da cultura galega.

O mesmo escritor, tamén dentro do selo editorial de Teófilo Edicións, vén de publicar o conto infantil “Os soños de Daniel”. Esta obra está destinada principalmente aos lectores máis novos, co obxectivo de que coñezan a vida, as pezas e o pensamento de Alfonso Daniel Rodríguez Castelao. Os nenos poderán percorrer unha viaxe imaxinaria polos soños e arelas de Castelao, a través das ilustracións de Isabel Pintado, que se converten nun xogo visual que acompaña ao texto coa mestura de cores vivas, trazos suaves e escenas que convidan á fantasía e a imaxinación. Polas páxinas desta historia, nas que se mestura realidade e ficción, os lectores máis pequenos descubrirán un neno coma eles, que debuxa, soña e imaxina unha Galicia diferente sobre un vello mapa de Fontán que, pouco antes da súa viaxe á Arxentina, atopa na casa dos seus avós.

A publicación desta obra, para o editor José Luis Teófilo, forma parte do marco da celebración do Ano Castelao, co obxectivo de cubrir o baleiro existente dentro das publicacións destinadas aos lectores máis novos, coincidindo co inicio do curso escolar. Unha proposta diferente, luxosamente editada e didáctica para achegar a figura de Castelao, e facela máis próxima a todos os que sintan a curiosidade de coñecer a súa traxectoria.

Segundo o autor, “Os soños de Daniel” pretende recrear os anos da infancia e adolescencia de Castelao, transcorridos entre o seu Rianxo natal e os da adolescencia en Arxentina. Unha homenaxe “a quen soñou cunha Galicia máis libre; unha invitación para descubrir a humanidade dun artista, político e escritor que, co seu talento, deu voz ás esperanzas dun pobo”. O resultado é un libro que se le coa mirada antes de descifrar o seu contido. “Os soños de Daniel” está escrito nunha linguaxe clara e fácil de comprender co obxectivo de ser lexible e accesible para o público infantil. Deste xeito, o autor reconstrúe os primeiros pasos de Castelao. Esta é a publicación número 15 de Teófilo Edicións no 2025 e entrégase nunha bolsa cun lazo a modo de agasallo, para continuar homenaxeando a Castelao no 75 aniversario do seu pasamento.