A Uvigo premia o labor de tres mulleres do Campus

A Universidade de Vigo volve a reafirmar e visibilizar o seu compromiso activo coa loita pola igualdade de xénero. Este xoves, no seu acto institucional co gallo do 8M -Día Internacional da Muller- entregou o seu premio Uviguala. O galardón recaeu este ano en Alejandra Babarro, Mercedes Pérez e Alba Portela, técnicas que xestionan o Espazo Violeta da Biblioteca Universitaria Rosalía de Castro do Campus de Ourense, onde se poñen en valor fondos deste centro no eido do feminismo e da igualdade.

Entre os méritos para a concesión do galardón a este espazo, a comisión que o concedeu apunta a súa destacada difusión e impacto entre os diferentes colectivos da comunidade universitaria. As tres galardoadas, engaden, “son un exemplo da implicación activa en prol da igualdade, xa que axudan a sensibilizar a comunidade universitaria sobre as cuestións de xénero, a importancia da igualdade e a necesidade de erradicar a violencia de xénero e as violencias sexuais. Neste senso, subliñan o traballo que se realiza desde este espazo para “visibilizar e destacar os traballos científicos das investigadoras internacionais, sobre todo as dos ámbitos de STEM, así como as traxectorias científicas das PDI e investigadoras da propia Universidade de Vigo, especificamente ás do campus de Ourense”.

A UVigo dedica o 8M ás mulleres lavandeiras: "Estas mulleres anónimas son as que apoderan a nosa loita pola igualdade"

O acto tivo lugar no Edificio de Ferro do campus de Ourense, contando coa asistencia de Manuel Reigosa, reitor da Universidade de Vigo; as e os vicerreitores Francisco Javier Rodríguez, Mónica Valderrama e Eva María Lantarón; Yolanda Rodríguez, directora da Unidade de Igualdade da UVigo, e membros da comunidade universitaria. Na súa intervención, o reitor lembrou que a loita pola igualdade é un dos eixes estratéxicos da institución académica e nun momento como o actual, no que, dixo, “moitas batallas que parecían gañadas agora se poñen en solfa” e avanza o discurso en contra da igualdade, fixo fincapé no “papel que ten que xogar a universidade na busca incansable da igualdade”.

As redeiras protagonistas

Pola súa banda, a directora da Unidade de Igualdade sinalou que este 8M “representa unha oportunidade para reforzar, novamente, o compromiso activo da Universidade de Vigo coa igualdade “real” de dereitos, o empoderamento e a ampliación de oportunidades para todas as mulleres da nosa comunidade universitaria”.

Ademais do premio Uviguala, o outro gran protagonista do acto institucional celebrado este xoves no campus de Ourense foron as mulleres lavandeiras, escollidas para protagonizar a campaña deste 8 de marzo na Universidade de Vigo. “Queremos pór en valor o papel das traballadoras que rompen cos estereotipos de xénero a través da figura das lavandeiras. Estas mulleres desenvolveron un traballo que requiría de gran fortaleza física, xa que non só pasaban longas xornadas na auga fría enxaboando, fregando e clareando a roupa, senón que cargaban con ata 30 kg de roupa mollada para facer o seu traballo”, sinalou Yolanda Rodríguez.

Ademais, en moitos casos, tamén exercían como costureiras, pranchadoras e tecedoras. “Elas foron, e son, figuras de memoria e acción. Estas mulleres anónimas son as que apoderan a nosa loita pola igualdade”, afirmou. Esta reivindicación das lavandeiras centrou tamén a regueifa feminista que ofreceu Branca Trigo no acto celebrado onte no Campus de Ourense. Nela foi fiando o traballo destas lavandeiras, o das regueifeiras e a loita pola igualdade de xénero.

Neste 8M a Universidade de Vigo adheriuse aos manifestos de entidades como a Conferencia de Rectores y Rectoras de las Universidades Españolas (CRUE) e tamén da Red de Unidades de Igualdad de Género para la Excelencia Universitaria (RUIGEU).