A UVigo sinala o 8 de setembro para empezar o próximo curso académico

A actividade académica da Universidade de Vigo para o vindeiro curso 2025/2026 comezará o 8 de setembro e rematará o 5 de xuño. Así o aprobou este mércores o Consello de Goberno, presidido polo reitor da institución, Manuel Reigosa, no seu Campus de Vigo. Neste sentido, o primeiro cuadrimestre irá dende o 8 de setembro ata o 23 de xaneiro, mentres que o segundo botará a andar ao día seguinte, 24 de xaneiro, e concluirá o 5 de xuño. En ambos casos están incluidas as datas de probas ordinarias. 

Con todo, o calendario académico, máis aló da actividade docente, comprende entre o 1 de setembro e o 31 de agosto, non sendo lectivo nin o mes de agosto nin os períodos comprendidos entre o 20 de decembro de 2025 e o 7 de xaneiro de 2026, ambos incluídos, -coincidindo coas vacacións de Nadal-, e entre o 30 de marzo e o 3 de abril de 2026, tamén ambos incluídos -coincidindo coa Semana Santa-. A docencia tamén se interromperá o 16 e 17 de febreiro polo Entroido.

Ademais, o período comprendido entre os días 1 e 7 de setembro non computará para os efectos de actividades lectivas, pero neses días si que se poderán desenvolver actividades académicas non lectivas. O mesmo sucederá co período comprendido entre o 8 de xuño e 31 de xullo de 2026. Ademais dos festivos nacionais, autonómicos e locais, terá carácter festivo o luns, día 26 de xaneiro de 2026, no que se celebra o patrón da Universidade, San Tomé de Aquino, así como as festividades dos patróns que correspondan a cada centro de ensinanza.