A xuventude investigadora cítase en Ourense o 24 de setembro

Os días 24 e 25 de setembro terá lugar o I Congreso Transnacional do Campus Auga da Xuventude Investigadora (Aquaxi´25). A cita nace “co propósito de ofrecer un espazo de diálogo e difusión de resultados de investigación, promovendo o intercambio de coñecementos, a aprendizaxe compartida e a creación de redes de colaboración entre a nova xeración científica”, indican dende o Campus Auga, anfitrión do congreso.

O congreso está especialmente pensado para persoal investigador en formación, tanto en etapas predoutorais como posdoutorais. Con todo, a participación está aberta tamén a persoas cunha traxectoria investigadora consolidada que desexen contribuír ao enriquecemento científico e académico do encontro. A todos ofréceselles “unha oportunidade valiosa para presentar traballos nun ambiente accesible e enriquecedor”, engaden os voceiros universitarios.

O termalismo, a biotecnoloxía, a alimentación e o medio ambiente serán as liñas temáticas do encontro, ó que xa poden enviarse comunicacións e pósters.