Tenreira ao espeto e empanada de polo, menú de luxo en Paderne de Allariz

FESTA POPULAR

Arredor de 250 de persoas ateigaron o pavillón de Paderne de Allariz nunha degustación gastronómica con amenización musical

As brasas foron o ingrediente esencial para que os 150 quilos de tenreira galega estiveran a punto. | Iago Cortón

O Concello de Paderne de Allariz segue a consolidar ano tras ano a súa festa de exaltación gastronómica, centrada desta vez na tenreira galega ao espeto e a empanada de polo de curral.

A combinación destas dúas exquisiteces foi o prato forte da 5º edición, unha animada xornada no pavillón municipal con actividades lúdico-deportivas para a cativada, e máis a amenización musical da charanga El Tattoo.

Veciños e visitantes encheron o pavillón municipal de Paderne de Allariz. | Iago Cortón

Ao mediodía, moreas de veciños e visitantes á vila comezaron a encher o recinto, con ganas de saborear un completo menú que encantou a todo o mundo, nunha cita que ano tras ano vai aumentando a súa capacidade de atracción. En total servíronse 150 quilos de tenreira e 30 empanadas de medio quilo.

Por se todo isto fora pouco, durante a actuación da banda procedeuse a sortear agasallos cos tickets da comida, a modo de rifa, o que axudou a animar aínda máis unha xornada solleira e de moito calor en Paderne.