Parada de Sil festexou o Día Mundial do Cacao

A Casa do Chocolate de Teimende converteuse este domingo 6 de xullo nun fervedoiro de visitantes para celebrar o Día Mundial do Cacao cunha actividade que combinou divulgación, cultura e sabor. Organizada polo Concello de Parada de Sil, a xornada tivo como eixo principal o lema “O cacao: da selva ao espazo”, propoñendo un percorrido didáctico e sorprendente pola historia e o futuro do cacao.

A proposta incluíu visitas guiadas gratuítas cada hora, en quendas de mañá e tarde, que tiveron unha acollida excepcional, completando o aforo en todas as sesións. Ademais, as persoas asistentes puideron gozar dunha degustación de chocolate e bica, nun ambiente festivo e familiar, rodeados do aroma e a historia do produto estrela deste espazo museográfico.

A actividade permitiu non só coñecer en profundidade o mundo do cacao e o seu proceso de transformación, senón tamén poñer en valor o patrimonio local a través da colección museográfica Casa do Chocolate , Chocolates Casares, situada na localidade de Teimende.

Desde o concello destacan o éxito da xornada e a resposta do público, e agradecen a participación de todas as persoas asistentes nun día que demostra que o sabor e o territorio van da man.