Pereiro dá luz verde para a ampliación do Ben Cho-Shey

A Xunta de Goberno do Concello de Pereiro de Aguiar vén de aprobar a licencia para ampliar o colexio Ben Cho-Shey, un proxecto que contará cun orzamento de case 2 millóns de euros.

A previsión é que os traballos poidan comezar no verán, unha vez finalice o período de licitación que se abre agora. Esta importante obra consistirá en aumentar a superficie construída total, fixándoa en 1.324,20 metros cadrados, repartidos en 452,85 metros cadrados en planta semisótano, 435,75 metros cadrados en planta baixa e 435,60 metros cadrados en planta alta.

Na planta semisótano, xerarase un patio cuberto para o alumnado de infantil, cun novo núcleo de aseos que dá servizo a esta zona de espazos exteriores. Na planta baixa, ampliarase o comedor e o núcleo de aseos, así como dúas aulas máis de Infantil. Na planta alta, ampliarase o núcleo de aseos, así como catro aulas máis (unha delas de música e dúas de desdobre). Así mesmo, crearase unha pérgola cuberta de acceso ao centro, co fin de protexer aos cativos e cativas os días de choiva, e cambiarase tamén o lucernario da cuberta. Por último, crearase maior superficie de arquivo e almacenaxe de cuarto de limpeza.

O goberno local tamén informa de que xa rematou o concurso de ideas para o proxecto de construción do novo instituto

O proxecto de ampliación, que se anunciou a finais do 2023, nace para dar resposta a crecente demanda de prazas educativas de Infantil e Primaria no municipio, que practicamente se dobrou dende comezos de século. Dende o goberno local destacan que se “trata dunha obra fundamental para o municipio de Pereiro, dado o intenso crecemento demográfico que vén experimentando este concello nos últimos anos, e pensada para dar o mellor servizo aos cativos e cativas, así como ao equipo docente que traballo no colexio”.

O instituto, máis preto

O Concello de Pereiro de Aguiar tamén informa de que vén de rematar o prazo de revisión do concurso de ideas para o proxecto do de construción do novo instituto, paso previo á adxudicación das súas obras, que deberían comezar entre finais deste ano e comezos de 2026. A previsión inicial é que o centro teña capacidade para máis de 300 alumnos.

As obras de ampliación do Ben Cho Shey e de construción do instituto de Pereiro, “constitúen un gran proxecto de futuro fundamental para consolidar o asentamento de familias no noso municipio, ao garantir unha educación pública e de calidade no noso municipio en todos os cursos de ensinanza obrigatoria”, sinalan dende o Concello de Pereiro de Aguiar.