O ciclo do pan enche de actividades o Val do Limia

Os días 31 de maio e 1 de xuño celebrarase no Val do Limia unha xornada sobre o ciclo do pan no Xurés. Os municipios de Lobeira, Lobios, Calvos de Randín e Baltar acollerán diferentes obradoiros, roteiros e visitas guiadas ao redor do patrimonio etnográfico. A actividade, que require inscrición previa, é froito da colaboración de Espazo16, Grupo Tragsa e Costa Oeste.

As actividades comezarán o sábado 31, coa sementeira e un obradoiro de paisaxes invisibles con Fran García e Manuel Bugallo ás 11:30 horas.

A actividade arranca o sábado 31 pola mañá cun obradoiro de paisaxes invisibles da man de Fran García e Manuel Bugallo

Pola tarde, a sega e almacenaxe protagonizarán a visita guiada ao patrimonio etnográfico de Puxedo ás 16:00 horas, na que colaborará a asociación de veciños e, ao remate, terá lugar o obradoiro de elaboración de pan e visita ao Ecomuseo do Pan do Xurés, onde se escenificará o enfornado e amasado.

O domingo, será a muiñada quen peche este ciclo cun roteiro guiado no Camiño privilexiado e o Couto Mixto, no que se visitará o seu patrimonio etnográfico da man de Ana Canal. Será ás 10 da mañá.

Para facer as inscricións poderase facer no correo de Espazo16. Esta actividade está aberta a tódolos públicos e ten como obxectivo poñer en valor o millo.