O folclore invade a provincia con danzas e ritmos globais

Bande albergou onte o inicio da xira provincial da XL edición das Xornadas de Folclore de Ourense. Na Praza da Constitución, os asistentes puideron desfrutar das danzas e ritmos de Chile, Irlanda do Norte e Xeorxia. Estes tres países presentaron ante a atenta mirada do público as súas raíces. Os chilenos, do “Ballet F. Municipal de Rancagua”, foron os primeiros en saír á escena. Fundado no 2008 por unha iniciativa da Ilustre Municipalidade de Rancagua, este grupo conta na actualidade con medio cento de integrantes, entre bailaríns e músicos, que se dedican á recuperación, transmisión e posta en escena dos costumes e tradicións relacionadas co folclore do país chileno.

No seu repertorio a agrupación fixo un percorrido pola xeografía do país suramericano, dende o norte até o sur, incluíndo a illa de Pascua. Amosaron tamén a diversidade de manifestacións étnico-culturais que conforman a poboación chilena: o carnaval norteño, a danza afro-boliviana ou a de orixe español.

O repertorio de cada agrupación participante é tan só unha pequena mostra da gran riqueza e variedade cultural que acolle cada país. Ao longo destes próximos días tratarán de achegalo por toda a provincia, co fin de por en valor a importancia de manter vivas as tradicións.

Tamén onte, no campo da Barreira de Allariz o grupo “Huayra Muyoj” de Arxentina, “Phicas of BC” de Filipinas e “Folk Dance Ensemble Volynianka” de Ucraína. Cando xa caera a noite estas agrupacións encargáronse de encher de cor o escenario, ofrecendo as súas danzas e ritmos aos presentes.

Para o mércores, 13 de agosto, Manzaneda e Maceda acollerán unha nova cita do festival. Ámbalas actuacións serán a partir das 22,30 horas. No Patio do Colexio de Manzaneda actuarán Arxentina, Filipinas e Ucraína. Mentres que na Rúa do Toural, de Maceda, subiranse ao escenario as agrupacións de Chile, Irlanda do Norte e Xeorxia.