G-Night achegará a ciencia con máis de 200 actividades

Cando se cumpre un lustro do seu nacemento, a G-Night, Noite das Persoas Investigadoras, achegará o vindeiro 26 de setembro máis de 200 actividades de divulgación científica ás sete principais cidades de Galicia. Baixo o lema “Conciencias creativas”, Ourense, Vigo, Pontevedra, Santiago, A Coruña, Ferrol e Lugo serán os escenarios de ducias de actividades que teñen o obxectivo de achegar a ciencia á cidadanía e espertar vocacións científicas, especialmente entre a mocidade, ao tempo que se ofrecen propostas de lecer científico, cultural e educativo para toda a familia.

Miles de persoas -na pasada edición rexistráronse máis de 7.000 participantes-, poderán achegarse de xeito lúdico ao mundo dos robots, ao cifrado matemático, ás aplicacións da IA, á seguridade viaria, ao efecto invernadoiro, microplásticos ou mesmo ás lesións muscoesqueléticas dos músicos. Haberá tamén charlas sobre aprendizaxe de linguas, unha camiñada para descubrir a pegada de Castelao en Pontevedra ou un obradoiro de escrita antiga. Estas son só unha pequena parte das actividades das que poderán gozar as persoas que participen na G-Night, tanto nos campus, como nas cidades de Vigo, Ourense Pontevedra.

Na cidade de As Burgas será posible viaxar ao pasado cun obradoiro de escrita antiga na Facultade de Historia e reflexionar sobre igualdade e dereitos no Café Torgal, a través dunha proposta de Ciencia no Bar centrada na xustiza social.

“Xuntos somos máis fortes e así o noso sistema de innovación medrará”, dixo Belén Rubio, vicerreitora de Investigación, Transferencia e Innovación da UVigo, que gabou o traballo de coordinación desenvolvido pola ducia de institucións que participan na organización da G-Night, así como dos centros de investigadores e investigadoras que tomarán parte na edición deste ano e da UCC+i. “Facémolo con ilusión, porque queremos achegar o noso traballo á cidadanía”, dixo Rubio.

A actividade está coordinada pola UVigo, á fronte dun consorcio no que participan as universidades de Santiago e Coruña, varios institutos do CSIC (IEGPS, IEO, MBG, IIM e Incipit), centros oceanográficos de Vigo e A Coruña do Instituto Español de Oceanografía e outros centros de investigación galegos de como o INIBIC, IDIS, CITMAga e CESGA. Nesta edición, a G-Night vai desenvolverse como un evento asociado a un proxecto europeo, empregando os recursos propios das entidades implicadas e co apoio da Xunta de Galicia a través da GAIN, Axencia Galega de Innovación dependente da Consellería de Educación, Ciencia, Universidades e Formación Profesional.