O magosto, a chama do outono ourensán

En Ourense, o magosto non é só unha festa: é unha emoción colectiva, un ritual que marca o tránsito entre o verán e o inverno, entre a fartura das colleitas e o abrigo das lareiras. Cando o outono pinta os montes de cobre e ouro, cando o aire se enche de fume e de risas, chega o tempo das castañas, do viño novo e das historias contadas á calor do lume.

A provincia de Ourense, coa súa paisaxe de soutos e tradicións, converte o magosto nunha celebración profundamente identitaria. Cada concello, cada parroquia, ten o seu xeito particular de honrar esta cita coa terra. En moitos lugares, como en Bande, Verín, Trives; Nogueira de Ramuín, Arnoia, Barbadás ou Xinzo, a festa reúne veciños e visitantes arredor das brasas para asar castañas, degustar produtos da matanza e brindar co primeiro viño do ano. É unha experiencia que combina gastronomía, cultura popular e sentimento comunitario.

As orixes do magosto pérdense no tempo. Os historiadores sitúano como unha tradición vinculada aos antigos ritos de agradecemento pola colleita e ao culto aos antepasados, coincidindo co Día de Todos os Santos. Hoxe, a esencia segue sendo a mesma: compartir, lembrar e celebrar a vida ao redor do lume. Moitos dos magostos actuais inclúen música tradicional, obradoiros para nenos, concursos de cabazas e actividades culturais que revitalizan o espírito festivo do outono rural.

Nas cidades, a tradición adaptouse aos novos tempos, pero sen perder autenticidade. En Ourense capital, por exemplo, o magosto do Parque de Montealegre ou o que se celebra nos barrios reúne cada ano a centos de persoas dispostas a manter viva a chama desta tradición. É unha oportunidade para recuperar sabores e costumes que definen a identidade ourensá.

Neste suplemento especial percorremos os diferentes magostos da provincia, dende os máis multitudinarios ata os máis pequenos e familiares. A través deles descóbrense non só receitas e costumes, senón tamén unha forma de entender a convivencia e o apego á terra. Porque o magosto, máis que unha festa, é unha maneira de ser e de estar en Ourense: un recordatorio de que o calor máis fondo non sempre vén do lume, senón das persoas que se reúnen ao seu redor.

Este suplemento tamén recolle outras celebración senlleiras ligadas ao outono como a XXIX Feira do Outono de Allariz. A feira celebrarase no pavillón do instituto da localidade durante a fin de semana, e as persoas asistentes poderán mercar nos postos instalados para a ocasión produtos de outono e de tempada, como meles, cogomelos, noces, castañas e derivados.

Estes días tamén haberá espacio para o deporte. O Concello de Piñor acollerá os días 8 e 9 de novembro de 2025 a quinta proba do Campionato de España de Enduro, unha gran nova para pilotos, patrocinadores e afeccionados. En Piñor vense disputando nos últimos anos unha das probas de Enduro que máis afeccionados atrae en Galicia.