Estudiantes poñen en valor o legado de Chamoso Lamas

O Museo Etnolóxico de Ribadavia acolle dende o venres a exposición “Manuel Chamoso Lamas na mirada”, unha mostra que xorde dos proxectos realizados no instituto do Carballiño que leva o seu nome, reunindo fotografías antigas e actuais de escavacións arqueolóxicas, monumentos e lugares que conforman boa parte do patrimonio cultural das comarcas do Ribeiro e do Carballiño.

A mostra inclúe 32 pezas que percorren as actuacións máis destacadas que o ourensán realizou e divulgou por toda Galicia. Ademais das imaxes, tamén se amosan publicacións como libros, revistas ou guías do autor e a filmadora que utilizaba para gravar os bens patrimoniais.

O director xeral de Cultura, Anxo M. Lorenzo, inaugurou a exposición acompañado do alcalde de Ribadavia, César Fernández, e de outras autoridades. Destacou “a implicación da xente moza coa historia da súa terra” e a colaboración do Centro de Estudos Chamoso Lamas, a través do historiador Xosé Luis Sobrado, que apoiou nesta proposta ao alumnado do centro educativo co fin “de pór en valor as importantes accións que o arqueólogo e investigador levou a cabo na defensa do patrimonio histórico e artístico galego, para ampliar o seu coñecemento”. Agradeceu tamén a presenza da filla e a neta do homenaxeado, Ángeles Chamoso e Cristina Eisermann, que achegaron materiais da súa colección particular.