MIT 2025 | Mostra Internacional de Teatro de Ribadavia

A Mostra Internacional de Teatro de Ribadavia celebra a súa 41ª edición cunha programación diversa, arriscada e comprometida.

A vila de Ribadavia acolle do 18 ao 26 de xullo a 41ª edición da Mostra Internacional de Teatro (MIT), un dos festivais de artes escénicas máis veteranos e prestixiosos do país, que este ano aposta decididamente pola contemporaneidade, a diversidade, o feminismo e os formatos híbridos.

A presentación oficial do programa tivo lugar o pasado xuño na necrópole do Castelo de Ribadavia, nun acto institucional no que participaron o alcalde César Fernández; o delegado territorial da Xunta en Ourense, Manuel Pardo; o subdelegado do Goberno, Eladio Santos; o director da AGADIC, Jacobo Sutil; e as responsables artísticas da MIT, Sabela Mendoza e Gena Baamonde.

A MIT 2025 inclúe máis de 35 actividades repartidas por unha ducia de espazos escénicos —desde o Auditorio do Castelo ata prazas, museos, espazos naturais ou parroquias do municipio— configurando un festival expandido, que se abre á comunidade e ao territorio.

23 espectáculos de teatro, danza, circo e performance

A programación de exhibición conta con 23 espectáculos procedentes de Galicia, do resto de España, Portugal, Italia e Brasil. Unha selección que combina linguaxes e formatos diversos, desde propostas íntimas ata grandes producións, e que aborda temas como a memoria histórica, identidade, saúde, ecoloxía, disidencia ou pensamento crítico.

A presenza galega é especialmente destacada, con nove compañías: Disiden.Cia, Ibuprofeno Teatro, La Guajira, Ártika, Ítaca Teatro, Pistacatro, Furia Sotelo, Chévere e o colectivo A Volátil, que participa por primeira vez na MIT. Ademais, celebrarase o 20º aniversario do Premio Abrente con actividades especiais.

Entre as propostas internacionais figuran a compañía italiana Parini Secondo con HIT (out); a portuguesa Circolando con Crátera; e a artista brasileira Mari Paula con Escambo, que tamén ofrecerá un obradoiro para infancia. Desde o panorama estatal destacan artistas e compañías como Luz Arcas/La Phármaco (Tierras raras), Los Torreznos (La cultura), Cris Blanco (Grandissima Illusione), Societat Doctor Alonso (Hospital de Campo), Malpelo (Bach), Kolektiv Lapso Cirk, María Jurado e Teresa Lorenzo, entre outras.

CONSULTA EL PROGRAMA COMPLETO

Formación, mediación e vínculo coa comunidade

A MIT reforza o seu compromiso coa creación e a mediación con 3 residencias artísticas, 6 obradoiros abertos a profesionais, público xeral e infantil, e un programa de foros, encontros e actividades paralelas. Entre os obradoiros destacan propostas como o de clown con Roi Borrallas, máscara neutra con Mar Navarro, o laboratorio El Desenterrador con Sofía Asencio e Tomás Aragay, ou o obradoiro de movemento infantil con Mari Paula.

O ciclo satélite da MIT tamén levará espectáculos a aldeas como San Cristovo, Sampaio, Santo André ou Francelos, descentralizando o acceso á cultura escénica de calidade.

Premios e recoñecementos

Esta edición incluirá a entrega do Premio da Academia Galega de Teatro ao director Xulio Lago, así como unha celebración especial polo 20º aniversario do Premio Abrente de dramaturxia. Tamén se outorgarán o Premio de Honra (que se anunciará na inauguración) e o Premio do Público, consolidado desde o ano 2000.

Entradas e abonos

Os abonos estarán á venda desde o 1 de xullo por 62 euros. A venda de entradas individuais comezará o 7 de xullo, con prezos de 7 euros (tarifa xeral) e 5 euros (tarifa reducida) para estudantes e persoas desempregadas, agás a inauguración e clausura, cun custo de 10 e 8 euros, respectivamente.

O programa tamén inclúe espectáculos e actividades de acceso gratuíto, como obradoiros, presentacións e accións participativas todos os días do festival. A MIT 2025 conta co apoio da Axencia Galega das Industrias Culturais (AGADIC – Xunta de Galicia), a Deputación de Ourense, o INAEM (Ministerio de Cultura), entre outras entidades colaboradoras.

Máis información, inscricións e entradas: www.mitribadavia.gal