Rouban partes das pezas de bronce da escultura de Buciños adicada a Rodolfo Prada nos Peares

A Garda Civil investiga o roubo de dúas pezas de bronce na escultura deseñada polo ilustre artista ourensán Manuel Buciños ao galeguista Rodolfo Prada, coñecido co alcume “Chamochín”, a súa aldea natal, Os Peares.

A Asociación Cultural Rodolfo Prada denunciou a desaparición da placa de bronce onde figuraba a inscrición de homenaxe Prada, na parte frontal da escultura, así como unha peza de bronce no lateral da mesma.

Os veciños notaron a desaparición hai xa semanas e recentemente, segundo puido saber este xornal, a Garda Civil estivo na localidade para preguntar pola desaparición, que segundo fontes veciñais data de finais do mes de abril e pola noite, tal e como sosteñen fontes veciñais, que aseguran que desapareceu de súpeto da noite á mañá.

O monumento en homenaxe a Rodolfo Prada (Os Peares, 28 de agosto de 1892 - Buenos Aires, 3 de novembro de 1980) colocouse o 5 de novembro de 2018 nos Peares, no xardín adxacente ao museo do tren, e diante da que fora a súa casa familiar. A escultura deste ourensán universal que levou o facho do galeguismo e a ourensanía pola Arxentina fora feita a bronce e pedra por outro ourensán universal, Manuel Buciños.

Naquel sobranceiro acto de novembro de 2018, acudira á inauguración o presidente da Xunta, daquela Alberto Núñez Feijóo, así como a neta do galeguista Prada, alias “Chamochín”, nun sentido acto que conseguía reparar, nalgún senso, a memoria deste ourensán, que fora home de confianza de Castelao, membro dun ourensanismo militante en América e un dos ourensáns máis universais.