Juan Luis Calviño, presidente do CRIXP Pan de Cea: “Este ano temos o obxectivo de acadar as 860.000 pezas certificadas”

Juan Luis Calviño, presidente do Consello Regulador da IXP Pan de Cea, afronta a súa primeira Festa de Exaltación á fronte da entidade, aínda que leva máis de dúas décadas implicado na súa organización. Panadeiro de profesión, defende a tradición dun oficio que gaña mercado, pero que precisa relevo xeracional.

Pregunta. Como afronta a súa primeira festa como presidente do Consello Regulador?

Respuesta. Asumín a presidencia en outubro, aínda que xa era vicepresidente e levo 23 anos colaborando na organización da festa, agora con mais responsabilidade.

P. Que novidades haberá este ano?

R. Seguimos potenciando a Ruta dos Fornos, que se celebra o sábado con degustación de pinchos, música e actividades, e o domingo haberá unha exposición e a presentación dun libro sobre o pan de Cea, ademais do xantar, música e degustación de productos do mar.

P. E experiencia como panadeiro non lle falta

R. O forno do Calviño ten 50 anos, e eu xa con catro ou cinco anos andaba por alí mentres meus pais cocían o pan. Dende o ano 92 púxenme ao fronte, cando se xubilaron meus pais.

P. Que cambiou na elaboración do pan?

R. O proceso segue sendo artesanal: seis horas de traballo, amasado a man durante unha hora e cuarto, con tranquilidade e paciencia.

P. Hai relevo xeneracional?

R. Cando eu era neno había 31 fornos. Agora quedamos 12, e a maioría herdados dos nosos pais porque queremos manter a tradición. A media de idade dos panadeiros é de 50 anos. Fai falta relevo xeneracional, pero é complicado porque é un traballo moi laborioso. Dúrmese pouco, traballase moito e hai poucas vacacións.

P. Pero a demanda medrou

R. Si, eu por exemplo vendo moito a Barcelona e Madrid. En Madrid teño un cliente que cada semana leva 15 pezas para unha comunidade de veciños. Tamén se vende moito en hostelería e no estranxeiro. Onde se vende menos é nos pobos, porque cada vez hai menos xente. O que compensa é que podemos facer distribución por mensaxería, senón do reparto nos pobos non se podería vivir.

P. ¿Cantas pezas se venden o ano?

R. O ano pasado vendéronse 750.000 pezas certificadas e este ano esperamos acadar as 860.000 pezas. Creo que chegaremos porque se incrementou o paso de xente que visita Oseira e de peregrinos.

P. ¿Qué fai único ao pan de Cea?

R. O seu sabor, a elaboración artesanal e que conserva a súa calidade durante catro ou cinco días.