Pérez Blecua, novo presidente do PP de San Xoán de Río

O Partido Popular de San Xoán de Río celebrou o seu congreso local nun encontro que serviu para renovar a dirección da agrupación e abrir unha nova etapa política no municipio. Xosé Miguel Pérez Blecua, alcalde da localidade, foi elixido novo presidente do partido, recibindo o respaldo do presidente provincial, Luis Menor, e de representantes da organización xuvenil como Nicole Grueira e Ignacio Campo.

Luis Menor destacou a capacidade de Blecua para combinar “a tradición e bo facer de antes” coa aposta por unha “nova ruralidade”, unha visión actualizada do rural que pon o foco na calidade de vida e na prestación de servizos adaptados aos tempos. “Non sobra ninguén”, dixo Menor, facendo fincapé na importancia da integración e da unidade do partido para seguir medrando electoralmente.

O novo presidente local do PP subliñou que o seu obxectivo é converter o partido nunha “ferramenta e motor de transformación do municipio”, e para iso contará cun equipo “diverso en idade, experiencia e preparación”, repartido a partes iguais entre mocidade e persoas con traxectoria política. “Temos que dar resposta ao rural de sempre, pero tamén a unha sociedade que muda e demanda outros servizos”, afirmou Pérez Blecua.

A dirección provincial do partido salientou tamén o bo traballo dos gobernos populares nos dous concellos da comarca onde o PP goberna: San Xoán de Río e Chandrexa de Queixa. Para Menor, son exemplos de boa xestión que poden marcar o camiño para ampliar en 2027 os gobernos populares nesta zona da provincia.