Río identificará as necesidades da súa mocidade

O Concello de San Xoán de Río lanza unha enquisa dirixida á mocidade rural de entre 16 e 30 anos, co obxectivo de recompilar información sobre as súas condicións de vida, oportunidades laborais, educativas e sociais, así como a súa visión sobre o futuro das súas vilas.

Esta iniciativa enmárcase no proxecto europeo Connecting Rural Europe: Networking and Development in Small Towns – Rural, que abrangue territorios de España, Italia, Croacia e Romanía.

A enquisa, que leva menos de dez minutos en completarse, permite analizar cuestións clave como o acceso á educación e ao emprego, as oportunidades culturais e sociais dispoñibles, ou a facilidade de acceso a servizos esenciais como a sanidade e o comercio. Ademais, afonda na percepción da mocidade sobre o futuro dos seus pobos e no seu grao de satisfacción coa vida no rural.

Entre as preguntas que se plantexan, destácanse aquelas relacionadas coas oportunidades laborais, a igualdade de xénero e a mobilidade xuvenil. Tamén se recolle información sobre os principais motivos que poderían levar a un mozo a mudarse a unha contorna urbana, así como os aspectos que máis valoran das súas vilas e aqueles que lles gustaría mellorar.

PRIMEIRO PASO

Esta enquisa constitúe o primeiro paso cara á creación dun grupo de traballo en cada país participante, no que se debaterán propostas e estratexias para fortalecer o papel da mocidade no desenvolvemento do rural europeo.