As obras de Santa Ana, en Sandiás, na súa recta final

As obras de humanización da aldea de Santa Ana, no concello de Sandiás, deron comezo o pasado mes de agosto grazas a un convenio de colaboración institucional entre o Concello e a Consellería de Vivenda e Planificación de Infraestruturas, mediante o cal a entidade autonómica financia o 70% do proxecto, e o Concello o 30% restante dun orzamento de preto de 290.000 euros. A empresa adxudicataria é Explotacións Medioambientais S.L.

As actuacións atenden a diferentes eidos, consistindo na demolición e movemento de terras, así como intervencións nas redes de baixa tensión e telecomunicacións, ademais de mellorar o alumeado público e as rede de pluviais. Así mesmo, o proxecto atende á renovación do pavimento en diferentes puntos da localidade, contando con diferentes tipos de acabados.

A aldea contará cunha cara renovada, xa que tamén se está actuando nos accesos a Santa Ana, facendo limpeza das marxes, reabrindo as cunetas e limpando canos e firme cun rego bicapa.

A administración local pretende, mediante estas actuacións e outras proxectadas, “o aumento da calidade de vida dos seus habitantes e a mellora das condicións medioambientais”, mantendo “a liña que nos caracterizou nos últimos anos”, ó dotar ós núcleos do municipio de “mantemento e renovación de infraestruturas básicas”.