O polideportivo de Sandiás, un compromiso a tres bandas

O polideportivo de Sandiás continúa as súas obras a bo ritmo e Luis Menor, presidente da Deputación de Ourense, visitouno onte en compañía do alcalde, Felipe Traveso; membros da corporación local; a secretaria territorial da Xunta de Galicia en Ourense, Silvia Dorado, e o xefe do Servizo Provincial de Deportes da administración galega, Manuel Pérez. Esta actuación é froito dun convenio asinado entre as tres administracións en xuño de 2024, no que se xustificaba que a práctica de actividade física é unha ferramenta para a mellora da saúde e da calidade de vida, ademais de ser un mecanismo de socialización e fonte de diversión. As obras, que contan co peche e construción da infraestrutura, tiveron un custe de 400.000 euros, dos cales a Xunta sufragou 180.000 e o Concello e a Deputación 110.000 euros por institución.

Acordo a tres bandas

“Unhas obras esenciais para a mellora desta infraestrutura e desfrute da veciñanza”, sinalou Menor, quen enxalzou a cooperación entre administracións “para dar servizos e xerar actividade económica”. “Isto é un exemplo de cooperación entre as administracións”, engadiu Silvia Dorado. Felipe Traveso sinalou que é “unha obra moi importante para Sandiás e pola que levábamos pelexando tantos anos”, aínda que o alcalde asegura que “en breve estará operativa”. As tres administracións consideran fundamental que “a práctica deportiva poida estar ao alcance do conxunto da poboación”.