Sandiás busca solucións para a súa zona húmida

A organización SEO/BirdLife celebra este xoves en Sandiás unha xornada participativa de divulgación para descubrir a zona húmida “esquecida” da xeografía ibérica: a Lagoa de Antela. Esta cita, que conta coa colaboración do Concello, busca “definir o futuro da zona húmida de Antela”, achegando a comunidade ao territorio, recuperando a sú memoria colectiva e analizando “a súa situación actual para definir, xunto coas administracións competentes, unha folla de ruta para a súa recuperación ecolóxica, social e cultural”.

A cita congregará a expertos, ONG, administracións públicas e entidades do territorio no Centro de Interpretación da Lagoa de Antela, que será o escenario das mesas redondas e os relatorios dos expertos.

A xornada dará comezo ás 9,15 horas coa benvida institucional, dando paso á presentación inicial que atenderá aos valores ambientais do territorio e o seu contexto actual. A primeira mesa redonda atenderá ao punto de partida e as posibilidades de restauración da Lagoa, e nel participarán representantes da Consellería de Medio Ambiente da Xunta, do Miteco, e das entidades participantes.

Ás 11,30 horas terá lugar a saída de campo guiada, que ao longo de dúas horas atenderá ao “pasado e presente” da Lagoa. Logo da pausa para o xantar de convivencia no local social da Casa da Lagoa, será a quenda das exposicións que atenderán a historia e cultura asociadas á Lagoa así como a súa flora e fauna. A cita rematará coas mesas redondas centradas nas experiencias de sostibilidade agrícolas, gandeiras e turísticas e o peche e compromiso colectivo, presentando as conclusións e a lectura da “Declaración ou Pacto por Antela”.