Sandiás marida obradoiros e exposicións nas Letras Galegas

O Día das Letras Galegas deste ano está dedicado ás cantareiras, e o Concello de Sandiás programou nove actividades de eloxio á oralidade a través da escoita, recitación, contar e cantar.

A primeira actividade levouse a cabo no PAI de Sandiás, “As cantareiras e os instrumentos tradicionais”, para que os máis cativos aprendan sobre os instrumentos tradicionais.

O 17 de maio terá lugar o obradoiro “Educación vocal, recollida de música popular e cantigas populares”, na Casa da Cultura, e nel intentarase facer unha recollida de cancións populares de tradición oral que coñezan as veciñas do municipio. Estará coordinado por Lucía Casal e Cristina Asenjo.

O obradoiro “De Rosalía ata as cantareiras. As mulleres nas letras” chegará ó PAI e o CEIP de Sandiás o 20 de maio da man da fábrica A Xanela do Maxín. “Mulleres, ritmo e tradición” de Sabela Olivares, será o derradeiro obradoiro, organizado pola Rede de Dinamización Lingüística.

Os xéneros orais e narrativos en torno á oralidade fantástica e a memoria dos lugares tamén terán un oco nesta programación, durante a cal se continuarán as visitas guiadas ó Centro de Interpretación da Lagoa de Antela, ademais das Xornadas de Toponimia en Sandiás, a cargo de Viente Feijoo en colaboración coa Real Academia Galega.

Para rematar, a oralidade poética e musicada terá o seu espazo na exposición da escritora e pintora Rochi Nóvoa, que se inaugurará o vindeiro 21 de xuño na Casa da Cultura de Sandiás.