Sandiás mellora a súa eficiencia enerxética

O Concello de Sandiás vén de iniciar as obras de mellora da eficiencia enerxética en edificios e infraestruturas vinculadas á prestación de servizos municipais, tales como a Casa de Cultura. o centro social, o salón de actos, a sala de exposicións e a sala polivalente, cun investimento total de 73.160,94 euros.

A baixa eficiencia enerxética destes edificios levou ao grupo de goberno a entender a “urxencia” de realizar diversas actuacións para mellorar a mesma, reducir o custo económico asociado e do mantemento constante, así como contribuír ao benestar e comodidae dos traballadores e usuarios das instalacións durante todo o ano. A empresa que recibiu a adxudicación das obras de mellora foi Elyte Xinzo.

Neste sentido están a realizarse diferentes actuacións como a mellora da envolvente térmica con trasdosado na parte interior da fachada principal mediante placa de xeso, a renovación integral da instalación de calefacción/climatización mediante a colocación de unidades externas e internas tipo casete ou parede, proxectándose unha instalación de xeración de calor mediante bombas e que permita dispoñer de frio no verán.

Ademais tamén se está a instalar nova iluminación, substituíndo zonas de luminarias e lámpadas obsoletas por luminarias con tecnoloxía LED, e consecuentemente de alta eficiencia enerxética.